الدنيا دى عمرها قصير
اقصر من التى شيرت
اللى لبسته
ونا صغير
اقصر من روحى
لما كترت عليها الهموم
اقصر من املى
قبل ما اتغير
--
عمرها قصير
اقصر من وقت السعادة
وكل فرصة للفرحة
ضيعتها ووقفت
متحير
--
الحياة اصغر
من صباع طفل مولود
اصغر من اننا نحزن فيها
على مال مش موجود
ليه بننسى
انها مجرد طريق وهينتهى
للخلود
--
ومع ذلك
بترمى نفسك فى المهالك
ولا بتنام بالليل
ولا بالنهار
ويقطف التفكير شعرك
وتضيع فى القلق عمرك
ضعيف الايمان
مهزوز الاركان
ومنهار
نفسك مش مطمنة
ولما تملك ارض
تدور ع الانهار
وتكنز دهب
وتجيب فى اراضى
وبرضه مش راضى
وتبنى بيوت
وتعدى حدود
وتجرى وتفوت
وبرضه مش راضى
--
الغفلة بتسرق عمرك
وبكرة هتموت
ومش هتاخد فى كفنك
غير عملك الفاضى
--
الدنيا ابسط من كده
لدرجة انك ممكن تملكها
وتلاقيها
فى قربك من ربنا
فى سلامة نفسك
و حب الناس ليك
فى الرضا اللى تشوفه
فى عينيها
وخوفها عليك
--
الحياة اسهل من كده
لدرجة انك ممكن تلاقيها
فى لمة اصحاب
فى سجدة تدمع فيها
تطلعك فوق السحاب
تلاقيها
فى باب مقفول عليك
وصحة بين ايديك
وواحدة بتحبك
وبتموت فيها
--
الحياة ممكن تملكها
لما تجيها
مع صحبة حلوة متجمعة
فى عزومة شاى
مع اغنية جماعية
بتغنى على ناى
فى قعدة على طبلية
وتفاؤل باللى جاى
---
انا اقدر ألاقيها
فى حبك انتى
فى روحك انتى
فى عينيكى
اللى احتلت مدينتى
--
صدقونى
لو الحياة .. هـــم
لازم ننساه
دى أقل
من اننا نديها
انتباه
ولو كان قلبك تاه
فى اكتر من اتجاه
افتكر انها اتجاه واحد بس
فى طاعة الله
--
هناك تعليقان (2):
قوة الايمان هي الحل الاوحد والوحيد للصبر على مصاعب الحياه
الدنيا تجارب ومطبات وربيع
طوق النجاه هو الامل وحسن الظن بالله
بكرا احلى .......
بكرة طلع فعلا احلى يا ندى
مسائك سكر
إرسال تعليق