فى القرنين ال خمستاشر وال ستاشر الميلاديين كان الجهل والتخلف هو صفة شعوب الارض وكانت الكنيسة افضل من استغل هذا التخلف واصبحت هى المتحكمة فى البشر وأقنعتهم بأن القسيس هو رسول الله فى الارض ومن يغضبه لن يدخل الجنة لذلك كان القساوسة والكنيسة يستعبدون العامة فى مقابل ان يرضوا عنهم ومرت الكنيسة فى ذلك الوقت بضائقة مالية صعبة فاخترعت شيئا جديدا تجنى كنوزا من وراءه وهو صكوك الغفران . قطع من الجلود والاخشاب لابد ان تشتريها حتى تدخل الجنة . فافعل ما تشتهى من المعاصى والخطايا واشتر ف النهاية بضعة صكوك غفران لكى تحجز مقعدك فى الجنة ..
مش عارف ليه افتكرت موضوع صكوك الغفران ده وانا ببحلق فى الحجاب الاستايل بتاع الايام دى
يعنى بقى الطبيعى اوى تلاقى بنت لابسة بنطلون ضيق اوى وبلوزة مجسمة هتتفرتك عليها وف نفس الوقت محجبة . يعنى شكلها متدين وراضية ربنا ولابسة الحجاب ومقضية فريضته وفى نفس الوقت عايشة وبتلبس الموضة المفتوحة زى البنات اللى مش محجبة
وجهة نظر تقولك .. ان الحجاب الميكس ده اتولد من القرف اللى البنات عايشينه بسبب الولاد .. البنات مش عارفة تعجب الولاد ازاى
لبسوا واسع وبقوا خيم ماشية .. محدش بصلهم .. وقالولهم ان الولاد دلوقتى لما يجو يختاروا بنت فى زحمة البنات دى بيبقوا مهووسين اكتر بالبنات اللى بيبنوا جسمهم ورشاقته وجمال تفاصيله
..
لبسوا فرى وشالوا الحجاب .. محدش عبرهم .. وقالولهم ان الولاد مش هيبصولكو بصة بجد دول بيتفرجوا عليكو بس لان الولد لما بيتجوز بينقى المحتشمة
طب نعمل ايه كبنات عشان نعجب الولاد ؟؟
من هنا جت الخلطة السحرية
وولا سحر ولا شعوذة وصلى ع النبى فى قلبك يا مؤمن
قالك ايه .. قالك ااه .. قالك الاتنين فى واحد .. الاحتشام والاستايل
!!!!!!!!!!!!!!
الكلام ف الموضوع ده مش حصة دين ولا درس اخلاق بس مادام بنتكلم عن رمز دينى الا وهو الحجاب فلازم نعرف انه مش لعبة وان ليه شروط .. مختصرة فى ان لبس البنت المحجبة لازم يبقى .. لا يصف ولا يشف الجسم
انما الحجاب بالمنظر اللى احنا شايفينه ده .. حجاب عايز حجاب
حد يعرف ايه المغزى من الحجاب ؟
الحجاب معمول عشان يغطى الشعر لانه مثير وملفت فمنعا للفتنة لازم يتغطى حتى لو كان الشعر مش حلو وتأثير اثارته قليل
فيعنى مش معقول نغطى اقل حاجة مثيرة
ومن تحت الحجاب نبين الاثارة بتفاصيلها ... اى منطق ده ؟
عندى هاجس بسيط
طالما انتى خدتى قرار فى حياتك يبقى لازم تبقى مقتنعة بيه وقد مسئوليته
ياكده يا متخديش القرار من اساسه .. لانه فيه قرارات متقبلش العك وشايف الحجاب من فوق ومفيش اى حجاب من تحت زى بالظبط اما تنزل الشارع وانت لابس قميص كلاسيك على بنطلون بيجامة
!!!!
البنت المحجبة طالما اتحجبت تبقى أمنت انه فريضة فلازم تعامله معاملة فروضها التانية .. مينفعش نتوضى من غير ما نغسل وشنا .. مينفعش نصلى من غير ما نسجد ماينفعش أغطى شعرى بحجاب ولبسى كله متناقض مع الحجاب
ولو حنتكلم بالحق فيه بنات محجبات لبسهم مقزز ومقرف ومش مدى على حجاب خالص وفيه بنات تانية كتير مش محجبات لبسهم مش محترم بكتير عن المحجبات ..
يعنى بنت لابسة هدوم واسعة ساتراها ومغطياها ومش مدية ع أى اثارة بس مش لابسة ايشارب وبشعرها
ولا بنت لابسة ايشارب على دماغها ومن تحت البنطلون ضيق مش عارفين حتى كتابة هذه السطور هو بيدخل فى رجليها ازاى
ومن فوق
لابسة بادى مجسم جدا مكانه اوض النوم مش الشارع خالص ؟؟؟
ولا المحجبة اللى لابسة جيبة قصيرة ورجليها باينة
ولا المحجبة اللى لابسة جيبة قصيرة ومن تحت شراب او كارينا
ولا المحجبة اللى لابسة عباية محزقة أسوأ من اى بادى او كارينا
أنهو اكتر احترام اللى بشعرها و لابسة واسع وفضفاض ولا نماذج المحجبات اللى فوق دول
!!!!!!!!!!
نظرية نص العما ولا العما كله وحاجة احسن من مفيش دى نظرية فاشلة جدا مع الحجاب الاستايل
الحجاب يا حجاب يا بلاش
وممكن تعتبروها دعوة منى لخلع الحجاب على فكرة اذا كان حيبقى ستايل ويادوب حتة اكسسوار زيادة وحاتفضل البنت تشوهه وتشوه صورته بلبسها ف المصايف طقم استرتش عليه او برمودا وتسميه مايوه شرعى ومايوه عرفى
سامع بنت هنا ممكن تقول .. انا حـــــرة
ابسط مفهوم عن الحرية الشخصية هو انك حر ما لم تضر يعنى حريتك بتقف عند حدود حرية الاخرين .. يعنى اعمل اللى انت عايزه طول مانت مش مضايق حد او مسبب ضرر لحد
والحرية الشخصية معناها .. اللبس واسع وفضفاض .. بس اللى انا اقصده هنا حريتنا اول ما ننزل من بيتنا .. لان الشارع ده لينا كلنا .. زى ما ليك حق فيه انا ليا نفس الحق.. لوانتى فى بيتك البسى اللى انت عايزاه محدش ليه عندك حاجة بس مادام نزلتى الشارع ماتتعديش حدود حريتك عشان مفيش حد تانى يعدى حدود حريته
ومدام كل واحد حر يلبس اللى هو عايزه يبقى التانى حر يعمل بقى اللى هو عايزه .. وكده مبقتش حرية
دى بقت فوضى
وعليه حريتك فى اللبس بتقف عند حدود باب بيتك
ولما تعدى باب البيت وتنزلى الشارع وسط الناس
لبسك الضيق مينفعش يتقال عليه حرية
لانك بلبسك ده .. بتأذى ناس تانيين
---
منقول بتصرف من كتاب .. بلد متعلم عليها .. ل مصطفى شهيب
الطبعة الرابعة
--
أرجو من الشباب ابداء رأيهم بكل تحضر ورقى بشأن مظهر البنت التى ترتدى الحجاب الاستايل
أرجو من البنات ابداء رأيهن لعل وعسى يكون هناك وجهة نظر لا نراها فى السياق
الرد وتبادل الحوار البناء أفضل من دفن رؤوسكن فى الرمال وعدم الرد
ليست هناك تعليقات:
إرسال تعليق