السبت
مش عارف اتكلم
ولا اضحك
ولا أتألم
لما بحكى
ع اللى حصل الجمعة
بتنزل دمعة
بتبكى
بتتكلم
النهاردة اول الاسبوع
يعنى ممنوع
الاقى حد
متبسم
----------
الحد
انا ماشى فى الشارع
ومش شايف حد
أكنش ماشى فى نفسى
كنت لقيت نبض وروح
وقلب بجد
يمكن ماشى فى حد تانى
برضه كان زمانه جانى
أكنش ماشى فى مكانى
هو أنا ليه لوحدى
ببكى
ومش لاقى حد
أكونش ماشى
فى حارة سد
----------
الاتنين
كل سنة وانت طيب
النهاردة عيد الحب
مش هتجيب قلب
لجمالات
هتجبلها كلب
وابويا السقا مات
بتتريقوا يا أوغاد
ده انا كنت حبيب حنين
وطيب
وقلبى كان برج بنات
بس كله بعد
بعد ما كان قريب
خلاص بقى
كل سنة وانت بتقابل
بمعاد
مش قلت هتجيب كلب
لجمالات ؟
--------------
التلات
انا بعمل حاجات غريبة
وكوميدية
بدى الصفارة للولية
عشان تصوت
وبضرب وداد
الاقيها بتزغرط
تصوروا
وانا بلعب كورة
كسرت رجل اياد
لقيت ايدى بتتخيط
بسمع اغنية لفؤاد
بيقول فيها
كنا فى اواخر الشتا
هو انا مركز اوى كده
لدرجة انى اادتها معاد
الخميس
وجاى اقابلها
التلات
طب هعمل ايه فى الوقت ده
خلاص هسمع فؤاد
فى اواخر الشتا
وبعدين اغنى مع حليم
ساعات ساعات
مش بقولكوا
النهاردة
التلات
---------
الاربع
انت حد جميل
بتنام بالنهار
وتصحى بالليل
طب هتذاكر امتى
ده بكرة الخميس
يوم ضيق وكبيس
زى بناطيل البنات
اللى هتخرج بكرة
بالهدوم الجديدة
تعرف ان حبيبتى الوحيدة
سبتها يوم الاربع
وطالما فشلك مربع
قوم ننزل الميدان
وبلاش نعدى من نفس المكان
عشان لما بشوفها
بحس ان جوايا
بيتقطع
ايه ده .. انت لسه نايم ؟؟
--------------
الخميس
وأهى دنيا بتلعب بينا
انتوا عارفين ان ايمانى ضعيف
نفسى أكل كل الرغيف
ومقسموش علينا
شايفين
اننا معتش بنشوف
غير ضعف وجبن وذل
وخوف
دى حتى الفرحة
بتبكينا
بطلوا بقى
النهاردة الخميس
يوم ضيق وكبيس
زى بناطيل البنات
يعنى فرفشوا بقى
واضحكوا ياولاد
بكرة الضحك هيغلى
هيضيفوا عليه
ضريبة مبيعات
وأهى دنيا بتلعب بينا
بــلــنــتــيــات
متنساش يا بلديات
ان ايمانى ضعيف
وان القصيدة اسمها تخاريف
وحبة حاجات
----------
تمت
تمت
هناك 17 تعليقًا:
ههه تخاريف تخاريف بس جميله جدا
انا لما قريتها فعلا تهت ودماغي لفت فيها
بس ده سر حلاوتها...... انها تبقى غريبه وتبقى تخاريف
اول مره اقرا نوع كده
بس جميله جدا جدا والله
و اكترمقطوعه عجباني بتاعت يوم الخميس
لاء بجد كتابه مختلفه ورائعه جدا
دمت بخير
هو أنا ليه لوحدىببكىومش لاقى حدأكونش ماشىفى حارة سد.....
عجبتنى اوى الكلمتين دول
ومقطع الخميس جاامد
جامدة يا محمد وتحياتى ليك
وأهى دنيا بتلعب بينا.....
جميلة اوى واسلوبها بسيط جدا جدا مش معقد الى مزيد من التوفيق والنجاح والتقدم يامحمد ان شاء الله
جميلة طبعا
واحلى ما فيها مقطع يوم الاربع والخميس
بس حاجة جديدةو مميزة
ربنا يوفقك
الله الله بجد كلهم اجمل من بعض
وخاصة
البيت :لوقيست الحياة باوقات الحزن
لكنت اطول الناس فى العمر
ندى الجميلة
احنا اجزاء كبيرة من حياتنا لما بنيجى نفكر فيها صح بنحس انها كانت تخاريف
التخاريف جزء لا يتجزأ من حياتنا
وجزء كبير جدا
يارب نفوق كلنا من التخاريف
ديرو
ويلكم يا قمر
فينك من زمان مش بشوفك يعنى
انا مش عارف الناس مجمعة على الخميس ليه
يمكن فيه مفاجأت فى اليوم ده
المهم شكرا على رايك وحلو اوى انك متابعة
مودتى
سمر
اى كتابة عامية بتبقى بسيطة الا كتابة الابنودى ونجم
مش بفهم لهجتهم العامية خالص
شكرا على المجاملة الرقيقة
ويارب نكون دايما عند حسن الظن
نهى شكرا جزيلا يا قمر
يارب تكون عجبتك
انا شايف برضه ان الخميس احلى يوم
بحرص دايما ان النهاية تكون غير تقليدية لان القارىء بيفتكرها دايما وبيحدد على اساسها انطباعه عن القصيدة
بس انا فى الاخر لازم اقول انى مش شاعر
انا لسه بحاول
هورلين يا جميلة
كويس انك قريتى كذا قصيدة
بس البيت اللى بتقولى عليه ده فى قصيدة تانية
ممكن تعلقى تحت القصيدة التانية مش دى
سيبك
المهم ان حاجة من كتاباتى عجبتك وانتى علقتى عليها
الف شكر
أخويا العزيز (متنساش انتا اللي سمحتلي أقولك كدة)....................انتا عارف كل اللي أقدر أقولو..انت حد جميل..عارفاك بتقول عليا في قرارة نفسك اني حرامية وسرقت مطلع جزئية يوم الأربع..بس فعلا دا أقل مايقال عليك..عارف كمان أجمل جزئية بتاعت يوم السبت بجد والله الجزئية دي بالذات بترجم اللي أنا عايشاه الأيام دي..ويمكن بترجم واقع جيلنا كله..الحمدلله علي كل حال..استمر في كتاباتك المتألقة..جدا..لأني بجد فرحت لما لاقيتك كاتب حاجة جديدة..وربنا يوفقك ويبارك في عمرك.سلاااام يا أديب
معتش كلام بجد يوصفك بجد رائع بتمنالك مزيد من التالق
بنت دمياط... اولا تقبلى تحياتى اختى العزيزة
انتى اول حد يقولى ان السبت رائع وده شىء بيفرحنى بالمناسبة
انا سعيد انك متابعة كل جديد ليا
بالمناسبة انا مش اديب ولا شاعر حتى
انا مجرد كاتب بيحاول ... خليكى فاكرة
جــــــــيـــوكــــنـــده
تسلــــــــــمــــــى
يا كبير يا كبير يا كبير يا كبير
باشا والله
وحياة ربنا جامد اخر حاجة عاجبني اوي
تصنيفك دا ...بجد اكتر من رائع والله
احلي حاجة في كتاباتك انها دايما مختلفة
وفيها حاجة جديدة
ودايما بتسعي لكدا تخاريف وشوية حاجات
عنوان جميل ومعبر بس اسمحلي اقولك انها مش تخاريف .وبس
دي اكيد بتجسد حقيقة عايشها وحاسس بيها وعشان كدا كتبتها ..ولو مكنتش حاسسها مكنتش كتبتها
بجد احلي تخاريف
انا عاجبني اوي يوم الحد
عاجباني اوي حتة
اكنش ماشي في نفسي
كنت لقيت نبض وروح
وقلب بجد
و يمكن ماشى فى حد تانى
برضه كان زمانه جانى
عاجبني اوي الحتة دي
جامد يا محمد ..يارب دايما كدا
بتكتب احسن ومن احسن للاحسن علي طول
يا كبرنا ..
مش عارف اقولك ايه يا سمسم
كلامك جميل اوى ومفيش رد يوفيه حقه
بجد شكرا
وانتى عارفة انى بستنى ردك دايما
تخاريف وحبة حاجات" جميلة جدآ وعنوانها أجمل وفعلآ إحنا كلنا عايشين في التخاريف دي وأنا كمان شايفة أجمل يوم هو يوم الخميس .
بس أنا عندي سؤال أنت لما بتكتب أي قصيدة بتكتبها الأول وبعدين تكتب العنوان في الآخر ولا بتكتب العنوان قبل القصيدة . هو ممكن يكون سؤال غريب شوية بس أصل أنا في قسم إعلام وعندنا لمانكتب أي مقالة علي الرغم من أن العنوان بيكون أول حاجة بس لازم يتكتب أخر حاجة في الموضوع وبيكون كتابة العنوان صعبه .
بس أنا ملاحظة أن جميع قصايدك بتكون عناوينها جميلة جدى ومعبرة عن القصيدة .
وكل موضوعاتك برده بتكون جميلة ربنا يوفقك دايمآ .
إرسال تعليق